Ögmundur Jónasson Innanríkisráðherra hefur ákveðið að leggja fram frumvarp til vopnalaga [smellið hér] sem unnið var í samvinnu við Skotvís (skotveiðimenn) og skotíþróttamenn. Þessi vinna byrjaði árið 2008 og skilaði nefndin af sér árið 2009 Frumvarpi til vopnalaga ásamt Reglugerð um skotvopn og skotfæri.
Allir aðilar sem komu að vinnu laganna á sínum tíma voru sammála um að lögin yrði til mikilla bóta fyrir veiðimenn, vopnaeigendur og ekki síst löggæsluna. Þannig er það mér ánægja að frumvarpið hefur loks komið fram í dagsljósið. Innanríkisráðherra hefur þó breytt því á nokkrum veigamiklum stöðum sem ekki er hægt að sætta sig við án umræðu og hef ég trú á að fulltrúar veiðimanna og íþróttamanna komi til með að mótmæla þessu kröftuglega. Í því sambandi er nauðsynlegt að allir veiðimenn standi saman og gangi í Skotvís, sem mun berjast fyrir hagsmunum okkar í þessu máli eins og öðrum. Stöndum saman!
Ég hef séð að umræðan á Hlað vefnum hefur verið um nokkur afmörkuð mál sem ég hef áhuga á að skýra í nokkrum orðum.
Hálfsjálfvirkar byssur
Í 1.mgr. 6.gr er lagt bann við sölu og framleiðslu á hálfsjálfvirkum og sjálfvirkum skammbyssum og rifflum, ásamt sjálfvirkum haglabyssum o.s.frv. og síðan í 2.mgr. 16gr - Enginn má eiga eða fara með þá hluti sem segir í 1.mgr. 6gr. laga þessara.
Í 2.mgr. 23.gr - Eiganda skotvopns er óheimilt að selja, gefa eða afhenda á annan hátt skotvopn sem bannað er í lögum þessum eða reglum samkvæmt þeim. Selja má þó slík vopn úr landi.
Í 48.gr ákvæðum til bráðabirgða segir: Bann við því að eiga og nota skotvopn í lögum þessum eða reglum settum samkvæmt þeim tekur ekki til skotvopna, sem fara í bága við lög þessi, hafi þau verið lögleg eftir eldri lögum.
Þetta þýðir á ef þú átt og ert með leyfi fyrir svona vopni þá mátt þú eiga það um ókomna tíð, eða selja það úr landi. Ath. Þú getur fengið byssuleyfið endurnýjað og haldið hálfsjálfvirku skammbyssunni. Hægt verður að fá leyfi fyrir einhleyptum skammbyssum, rúllettum single og double action eftir gildistöku nýju laganna. Einnig verður áfram leyfilegt að kaupa og selja hálfsjálfvirkar haglabyssur eins og þær sem til eru í búðum í dag, það er þriggja skota með tvö skot í magasíni og eitt í hlaupi.
Byssuskápur
2.mgr. 27.gr - Þegar skotvopn og skotfæri eru ekki í notkun skulu skotvopn geymd í læstri hirslu af viðurkenndri gerð. Þá skulu skotfæri geymd í læstri hirslu, aðskilinni frá skotvopninu, sem þau eiga við.
Ákvæði til bráðabirgða - Einstaklingur, sem fengið hefur skotvopnaleyfi og uppfyllir ekki ákvæði 2. mgr. 27. gr. laga þessara um geymslu skotvopns, sem hann hefur í vörslum sínum, skal innan tveggja ára frá gildistöku reglugerðar um geymslu skotvopna og skotfæra sanna fyrir lögreglustjóra að hann hafi bætt úr því……………..
Þrátt fyrir skilyrði II., III. og IV. kafla laga þessara skulu þeir, sem fengið hafa leyfi til þess að framleiða, flytja inn eða úr landi, versla með, eiga eða fara með skotvopn, skotfæri, sprengiefni og skotelda í gildistíð eldri laga, halda þeim réttindum sínum. Leyfishöfum ber þó að uppfylla skilyrði laganna þegar leyfi er endurnýjað.
Og í reglugerðinni verður væntanlega krafa um 3mm þykka stálskápa og þar verður leyfi til að nota skápa (2mm) sem viðurkenndir hafa verið fyrir gildistöku laganna. Þetta þýðir að þú átt að eiga byssuskáp við fyrstu byssu, einnig þegar þú endurnýjar leyfið eða kaupir viðbótarbyssu og færð þar með nýtt leyfi. Annars hefur þú tvö ár frá gildistöku laganna til að bæta úr þessu.
Fjöldatakmörk við 20 byssur
1.mgr. 19.gr. - Að frátöldum þeim sem greinir í 4., 9. og 13. gr. laga þessara er óheimilt að veita þeim, sem á fyrir 20 skotvopn eða fleiri, leyfi til þess að eignast fleiri skotvopn. Lögreglustjóri getur þó heimilað einstaklingi eða safni að eignast fleiri skotvopn svo og skotfæri fyrir þau, enda sé um að ræða vopn sem hafa ótvírætt söfnunargildi svo sem vegna tengsla við sögu landsins og þau ekki bönnuð samkvæmt lögum þessum.
1.mgr. 29.gr - Ráðherra er heimilt að setja í reglugerð nánari ákvæði um eftirtalin atriði:
g. skotvopna- og skotfærasöfn og meðferð safnvopna.
Þetta þýðir að ef þú vilt eiga fleiri byssur en 20, þá þarft þú að vera með mun betri geymsluaðstöðu en ella. Svo sem beintengt öryggiskerfi ofl. Nánar skilgreint í reglugerð.
Hljóðdeyfir
6.mgr. 23.gr. - Óheimilt er að setja hljóðdeyfi á skotvopn. Að því leyti sem það samrýmist friðunar- og veiðilöggjöf getur lögreglustjóri, ef nauðsyn ber til, veitt undanþágu frá þessu banni, sem nota skotvopn vegna atvinnu sinnar, svo sem við eyðingu vargs eða meindýra í þéttbýli.
Þetta þýðir að eigöngu þeir sem nota skotvopn vegna atvinnu geta fengið leyfi til að setja hljóðdeyfi á byssuna. Hljóðdeyfar eru almennt leyfðir í nágrannaríkjum okkar og hér er sett inn sú nýlunda að veita megi leyfi fyrir þeim í ákveðnum tilfellum. Þetta þarf að útvíkka því það getur verið æskilegt vegna veiða, heyrnarverndar og umhverfisástæðna að nota hljóðdeyfi. Ég tel að Skotvís muni berjast fyrir því.
Endurhleðsla
1.mgr. 7.gr. - Þrátt fyrir ákvæði 1. mgr. 4. gr. er handhafa skotvopnaleyfis heimilt að búa til skotfæri til eigin nota í þau skotvopn sem hann hefur réttindi fyrir, enda sé heimilt að nota slík skotfæri hér á landi.
Þetta þýðir að þeir sem eru með endurhleðslu réttindi og þeir sem fara á námskeið í endurhleðslu eftir gildstöku laganna meiga hlaða skot til eigin nota.
Margt gott er í lagafrumvarpinu og hinu reynum við í Skotvís að breyta með ykkar stuðningi.
Kveðja,
Ívar Erlendsson (fulltrúi Skotvís í nefnd um endurskoðaða vopnalöggjöf)
